સાઉદી અરબના હજ અને ઉમરાહ મંત્રાલયે ઉમરાહ વિઝાના નિયમોમાં મહત્વપૂર્ણ ફેરફાર કર્યો છે. નવા નિયમ અનુસાર, બહુવિધ પ્રવેશ (મલ્ટિપલ-એન્ટ્રી) વિઝા ધરાવતા શ્રદ્ધાળુઓએ પણ દરેક યાત્રા પહેલાં નુસુક પ્લેટફોર્મ પરથી નવું સેવા પેકેજ અને નવી ઉમરાહ પરમિટ મેળવવી ફરજિયાત છે. આ નિયમ 1 વર્ષના વિઝા ધરાવતા તમામ શ્રદ્ધાળુઓને લાગુ પડશે.
મંત્રાલયના આદેશ મુજબ, ઉમરાહ માટે જતા શ્રદ્ધાળુઓએ નુસુક પ્લેટફોર્મ પર નોંધાયેલા અધિકૃત સેવા પ્રદાતા પાસેથી ઉમરાહ પેકેજ બુક કરાવવું પડશે. આ પેકેજની તારીખો મુસાફરીની નિયત તારીખો સાથે મેળ ખાતી હોવી જોઈએ. આ પછી નુસુક એપ્લિકેશન દ્વારા નવી ઉમરાહ પરમિટ લેવી આવશ્યક છે. પરમિટની તારીખો પણ સેવા પેકેજની તારીખો સાથે સુસંગત હોવી જોઈએ.
આનો અર્થ એ થયો કે માત્ર માન્ય વિઝા હોવાના આધારે સીધા ઉમરાહ કરી શકાશે નહીં. દરેક નવી મુસાફરી વખતે અલગ સેવા પેકેજ અને નવી પરમિટ લેવી પડશે. વર્ષમાં એક કરતાં વધુ વખત ઉમરાહ કરવાનું આયોજન કરનારા શ્રદ્ધાળુઓએ આ નિયમનું ખાસ ધ્યાન રાખવું પડશે.
એક વર્ષના વિઝાની મુદત તેની ઇશ્યૂ તારીખથી 365 દિવસ સુધી માન્ય રહેશે. આ સમયગાળા દરમિયાન શ્રદ્ધાળુઓ સાઉદી અરેબિયાની મુલાકાત લઈ શકશે, પરંતુ ત્યાં કુલ રોકાણનો સમય 90 દિવસથી વધુ ન હોઈ શકે. દરેક વખતે અલગ પરમિટ મેળવવી ફરજિયાત છે.
પહેલી વખત ઉમરાહ કરનારા શ્રદ્ધાળુઓ માટે પ્રક્રિયા અલગ છે. તેઓએ સૌપ્રથમ નુસુક પ્લેટફોર્મ પરથી અધિકૃત સેવા પેકેજ પસંદ કરવું પડશે. ત્યારબાદ તેઓ વિઝા માટે અરજી કરી શકશે અને બાકીની ઔપચારિકતાઓ પૂર્ણ કરી શકશે. શ્રદ્ધાળુઓએ સાઉદી અરેબિયાના તમામ પ્રવેશ અને પ્રવાસન નિયમોનું પાલન કરવું પડશે.
આ નવા નિયમો ભારત અને ગુજરાતના શ્રદ્ધાળુઓ માટે પણ લાગુ પડશે. દર વર્ષે મોટી સંખ્યામાં ભારતીય શ્રદ્ધાળુઓ ઉમરાહ માટે સાઉદી અરબ જાય છે. ગુજરાતમાંથી પણ ઘણા લોકો આ યાત્રા કરે છે. તેથી આ નિયમો વિશે સંપૂર્ણ જાણકારી રાખવી જરૂરી છે.
મંત્રાલયે જણાવ્યું છે કે શ્રદ્ધાળુઓએ ફક્ત નુસુક પ્લેટફોર્મ પર નોંધાયેલા સેવા પ્રદાતાઓ સાથે જ વ્યવહાર કરવો જોઈએ. બિનઅધિકૃત એજન્ટો દ્વારા પેકેજ બુક કરવાથી છેતરપિંડી થવાની શક્યતા રહે છે. આ નિયમોનો હેતુ શ્રદ્ધાળુઓને સુરક્ષિત અને સરળ યાત્રા અનુભવ આપવાનો છે.
મંત્રાલયના જણાવ્યા મુજબ, રહેઠાણ, પરિવહન અને અન્ય સુવિધાઓનું વ્યવસ્થાપન સુદ્રઢ અને પારદર્શી બનાવવા માટે આ ફેરફાર કરવામાં આવ્યો છે. નુસુક પ્લેટફોર્મ દ્વારા તમામ પ્રક્રિયાઓ એક જ જગ્યાએ ઉપલબ્ધ થશે, જેનાથી શ્રદ્ધાળુઓને મુશ્કેલી નહીં પડે.
જે શ્રદ્ધાળુઓ ઉમરાહની યાત્રાનું આયોજન કરી રહ્યા છે, તેઓએ નવા નિયમો અનુસાર જ પ્રક્રિયા પૂર્ણ કરવી જોઈએ. વિઝા, પરમિટ અને સેવા પેકેજ અંગે વધુ માહિતી માટે નુસુક પ્લેટફોર્મની મુલાકાત લઈ શકાય છે.