નર્મદા જિલ્લાના રાજપીપળામાં આવેલી હિન્દુ દેવસ્થાન સમિતિની નવી નિમણૂકોને લઈને રાજવી પરિવારના યુવરાજ માનવેન્દ્રસિંહે વિરોધ નોંધાવ્યો છે. તેમણે જિલ્લા કલેક્ટરને રજૂઆત કરીને જણાવ્યું છે કે, સમિતિમાં રાજકીય પક્ષ સાથે સંકળાયેલા વ્યક્તિઓનો સમાવેશ કરાયો છે, જ્યારે રાજવી પરિવારના વંશજને સ્થાન આપવામાં આવ્યું નથી.
માનવેન્દ્રસિંહે કલેક્ટરને કરેલી રજૂઆતમાં જણાવ્યું છે કે, રાજપીપળા હિન્દુ દેવસ્થાન સમિતિની નવી રચના રાજવી પરિવાર સાથે પરામર્શ કર્યા વિના કરવામાં આવી છે. આ સમિતિમાં રાજકીય વ્યક્તિઓને સ્થાન આપવામાં આવ્યું છે, પરંતુ પરંપરાગત રીતે મંદિર સાથે સંકળાયેલા રાજવી પરિવારના કોઈ સભ્યનો સમાવેશ કરવામાં આવ્યો નથી. તેમણે આને અન્યાય ગણાવ્યો છે.
રાજવી પરિવાર તરફથી માનવેન્દ્રસિંહે કહ્યું કે, માતાજીના મંદિરને રાજપીપળા લાવવામાં આવ્યા હતા. રાજવી પરિવારનો ઐતિહાસિક સંબંધ આ દેવસ્થાન સાથે રહ્યો છે. નવી નિમણૂકમાં રાજવી પરિવાર તરફથી માત્ર તેમનું જ નામ રાખવામાં આવ્યું છે, જ્યારે પરિવારના અન્ય સભ્યોના નામ સૂચવવા છતાં તેમને સ્થાન નથી આપવામાં આવ્યું.
આ ઉપરાંત, માનવેન્દ્રસિંહે મંદિરના આર્થિક વ્યવહારનો મુદ્દો પણ ઉઠાવ્યો છે. તેમણે જણાવ્યું કે, છેલ્લા 25 વર્ષથી મંદિરના આર્થિક વ્યવહારનું ઓડિટ કરવામાં આવ્યું નથી. આ બાબતે પારદર્શિતા લાવવાની જરૂર છે, અને નવી સમિતિએ આ તરફ ધ્યાન આપવું જોઈએ.
રાજપીપળા વિસ્તારમાં આ મંદિર શ્રદ્ધાળુઓ માટે મોટું ધાર્મિક કેન્દ્ર છે. રાજવી પરિવારનું આ મંદિર સાથેનું જોડાણ સદીઓ જૂનું છે. સૂત્રોના જણાવ્યા અનુસાર, નવી સમિતિના ગઠનમાં રાજકીય હસ્તક્ષેપ થયો હોવાની ફરિયાદ પણ સામે આવી છે. જોકે, આ મામલે સમિતિ અથવા સરકાર તરફથી કોઈ સત્તાવાર પ્રતિક્રિયા આપવામાં આવી નથી.
માનવેન્દ્રસિંહે કલેક્ટરને કરેલી રજૂઆતમાં વિનંતી કરી છે કે, દેવસ્થાન સમિતિની રચનામાં રાજવી પરિવારના વંશજને યોગ્ય સ્થાન આપવામાં આવે. તેમણે એમ પણ કહ્યું છે કે, ધાર્મિક સંસ્થાઓના સંચાલનમાં રાજકારણ ન આવવું જોઈએ. આ બાબતે કલેક્ટર કચેરી તરફથી શું કાર્યવાહી કરવામાં આવે છે તે જોવું રહ્યું.