ગુરુવારે નેપાળ અને તિબેટમાં આવેલા ભારે પૂરમાં મૃત્યુઆંક વધીને 392 થયો છે. નેપાળમાં 389 અને પડોશી તિબેટમાં 3 લોકોના મોત થયા છે. અત્યાર સુધીમાં કુલ 1,468 લોકો ગુમ છે, જેમાં 290 ભારતીય નાગરિકોનો સમાવેશ થાય છે. બચાવકર્મીઓ સેંકડો ગુમ થયેલા લોકોને શોધવા માટે યુદ્ધના ધોરણે કામ કરી રહ્યા છે.
આ પૂર બુધવારે આવ્યું હતું, જ્યારે નેપાળ-તિબેટ સરહદ નજીક હિમનદી તૂટવાથી ભૂસ્ખલન થયું હતું. આ ભૂસ્ખલન બાદ મધ્ય નેપાળમાં પાણી, કાદવ અને કાટમાળનો પ્રવાહ ફેલાયો હતો. આ પ્રવાહે અનેક નગરો અને ગામડાઓને તબાહ કરી દીધાં હતાં, ઘરો, વાહનો, રસ્તાઓ અને પુલો તણાઈ ગયા હતા અને જળવિદ્યુત પ્રોજેક્ટ્સને નુકસાન થયું હતું.
નેપાળ પોલીસના નિવેદન અનુસાર, હેલિકોપ્ટર દ્વારા 50 વિદેશીઓ સહિત 796 લોકોને બચાવી લેવાયા છે, જ્યારે અન્ય 796 લોકોને રોડ માર્ગે સલામત સ્થળે ખસેડવામાં આવ્યા છે. બચાવકર્મીઓ હજુ પણ ગુમ લોકોની શોધમાં જોડાયેલા છે. અધિકારીઓએ જણાવ્યું કે તિબેટમાં 558 લોકો હજુ ગુમ છે.
ભારતે આ આપત્તિ બાદ પોતાના નાગરિકોની ઓળખ શરૂ કરી છે. વિદેશ મંત્રાલયે જણાવ્યું કે 290 ભારતીય નાગરિકોનો હજુ સંપર્ક થયો નથી. મંત્રાલયે કહ્યું કે તેમને શોધવા અને બચાવવા માટે તમામ પ્રયાસો કરવામાં આવી રહ્યા છે. અત્યાર સુધીમાં 84 ભારતીય નાગરિકોને બચાવી લેવાયા છે, જેમાં બાંધકામ હેઠળના ત્રિશુલી હાઇડ્રોઇલેક્ટ્રિક પ્રોજેક્ટમાં કાર્યરત 63 કામદારો અને તમિલનાડુના 21 લોકોનો સમાવેશ થાય છે.
અમેરિકાના રાષ્ટ્રપતિ ડોનાલ્ડ ટ્રમ્પે નેપાળને મદદની ઓફર કરી છે. તેમણે આ વિનાશને ગંભીર ગણાવ્યો અને કહ્યું કે, 'અમે નેપાળના સંપર્કમાં છીએ અને તેમને જરૂરી મદદ આપવા તૈયાર છીએ. અમારા સંબંધો સારા છે.'
ચીની અધિકારીઓના જણાવ્યા અનુસાર, પૂર બાદ તળાવમાં આશરે 20 લાખ ઘનમીટર પાણી એકઠું થયું હતું. આગામી ત્રણ દિવસમાં વધુ 3 લાખ ઘનમીટર પાણી તેમાં વહેવાની ધારણા છે, જેના કારણે કુદરતી અવરોધ તૂટવાની ચિંતા વધી ગઈ છે. હવામાન વિભાગ અને સ્થાનિક વહીવટીતંત્ર સ્થિતિ પર નજર રાખી રહ્યા છે અને અસરગ્રસ્ત વિસ્તારોમાં રાહત કામગીરી ચાલુ છે.