નેપાળમાં આવેલા વિનાશક પૂર બાદ ભારતીય વિદેશ મંત્રાલયે જાહેર કર્યું છે કે ૨૮૮ ભારતીય નાગરિકો સાથે સંપર્ક થઈ શક્યો નથી. આ પૈકી ૨૧ લોકોને સુરક્ષિત રીતે બચાવી લેવામાં આવ્યા છે. વિદેશ મંત્રાલયના પ્રવક્તા રણધીર જયસ્વાલે પ્રેસ બ્રીફિંગમાં આ માહિતી આપી.
અસરગ્રસ્ત વિસ્તારોમાં સંચાર વ્યવસ્થા તૂટી પડતાં આ લોકો સાથે સંપર્ક કરવો મુશ્કેલ બન્યો છે. જયસ્વાલે જણાવ્યું કે ગુરુવારે બપોરે ૧ વાગ્યા સુધીમાં તમિલનાડુના ૨૧ યાત્રાળુઓને સુરક્ષિત રીતે બચાવી લેવાયા છે. તેઓ કૈલાશ માનસરોવર યાત્રા માટે ગયા હતા.
સંપર્કવિહોણા ૨૮૮ ભારતીયો પાંચ મુખ્ય જૂથોમાં વહેંચાયેલા છે. પ્રથમ જૂથ ત્રિશૂલી-૧ પાવર પ્રોજેક્ટ પર કામ કરતા ૭૩ ભારતીય કર્મચારીઓનું છે. તેમના પ્રોજેક્ટ હેડ સાથે મંત્રાલય સીધા સંપર્કમાં છે.
બીજા જૂથમાં તમિલનાડુથી કૈલાશ માનસરોવર ગયેલા યાત્રાળુઓ છે. આ બે જૂથ છે – ૩૭ અને ૪૯ નાગરિકો, જેઓ 'સમ્રાટ ટ્રાવેલ્સ' અને 'ફ્લાય એવરેસ્ટ ટ્રાવેલ્સ' મારફતે ગયા હતા.
ત્રીજા જૂથમાં સમ્રાટ ટ્રાવેલ્સ મારફતે ગયેલા પશ્ચિમ બંગાળના ૩૨ નાગરિકો છે, જેઓ રસુવા જિલ્લાના તિમુરેમાં છે. ચોથા જૂથમાં 'રીચા ટુર્સ' મારફતે ગયેલા વિવિધ રાજ્યોના ૬૧ નાગરિકો છે. પાંચમા જૂથમાં કેરળના નાગરિકો છે.
ભારત સરકાર નેપાળ અને ચીનની સરકારો સાથે સતત સંપર્કમાં છે. ત્રિશૂલી-૧ પાવર પ્રોજેક્ટના કર્મચારીઓ અને યાત્રાળુઓ સિવાય ચીન તરફ પણ આશરે ૨૦૦ ભારતીય યાત્રાળુઓ અટવાયા છે. તેઓએ ભારત સરકાર પાસે મદદ માંગી છે. બેઇજિંગ સ્થિત ભારતીય દૂતાવાસ ચીન સાથે સંકલન કરીને તેમને સુરક્ષિત બહાર કાઢવા પ્રયાસ કરી રહ્યું છે.
વડાપ્રધાન નરેન્દ્ર મોદીએ નેપાળના વડાપ્રધાન સાથે વાતચીત કરીને શોક વ્યક્ત કર્યો છે. ભારતે પડોશી દેશને માનવીય સહાય અને રાહત સામગ્રી પણ મોકલી છે. વિદેશ મંત્રાલયે જણાવ્યું કે સ્થિતિ સામાન્ય ન થાય ત્યાં સુધી રેસ્ક્યુ અને રાહત કામગીરી ચાલુ રહેશે.