નેપાળ-તિબેટ સરહદ વિસ્તારમાં ત્રણ દિવસ પહેલાં આવેલા ભારે પૂર બાદ હજુ પણ મૃતદેહો મળવાનો સિલસિલો યથાવત છે. નેપાળ સરકારના આપદા વ્યવસ્થાપન વિભાગ અનુસાર, મૃત્યુઆંક વધીને ૪૬૯ પર પહોંચ્યો છે. ૩૦ કરતાં વધુ દેશોના નાગરિકોનો સંપર્ક તૂટ્યો હોવાનું જાણવા મળે છે, જેમાં ભારત, અમેરિકા, ચીન, બ્રિટન, ઓસ્ટ્રેલિયા, કેનેડા અને યુક્રેનના પ્રવાસીઓ તથા મજૂરોનો સમાવેશ થાય છે.
રાહત અને બચાવ કામગીરી ઝડપથી ચાલી રહી છે. નેપાળ પોલીસે જણાવ્યું હતું કે, અત્યાર સુધીમાં ૧,૬૦૦થી વધુ લોકોને હેલિકોપ્ટર અને જમીની માર્ગે સુરક્ષિત બહાર કાઢવામાં આવ્યા છે. ચિતવન જિલ્લામાં સૌથી વધુ ૧૩૭ મૃતદેહો મળ્યા છે. રસુવા, નુવાકોટ, ધાદિંગ, ગોરખા, તનહું અને નવલપરાસી જિલ્લાઓમાંથી પણ મૃતદેહો મળ્યા છે. પૂરને કારણે ૩૫ પુલ, ૪૫ ઝૂલતા પુલ અને લગભગ ૪૦ કિલોમીટરના રસ્તા નષ્ટ થયા છે. ત્રિશૂલી અને દેવીઘાટ જેવા હાઇડ્રોપાવર પ્રોજેક્ટ્સને પણ નુકસાન પહોંચ્યું છે.
ભારતે નેપાળમાં રાહત માટે અત્યાર સુધીમાં ૪૭.૫ ટન સામગ્રી મોકલી છે, જેમાં દવાઓ અને ખાદ્ય સામગ્રીનો સમાવેશ થાય છે. વિદેશ મંત્રી એસ. જયશંકરે કાઠમંડુ અને બેઇજિંગ સ્થિત ભારતીય દૂતાવાસો સાથે સ્થિતિની સમીક્ષા કરી હતી. અત્યાર સુધીમાં ૮૪ ભારતીય નાગરિકોને સુરક્ષિત બચાવી લેવાયા છે, જેમાં ત્રિશૂલી-૧ પ્રોજેક્ટના ૬૩ મજૂરો અને તમિલનાડુના ૨૧ લોકો સામેલ છે. જોકે, ભારતના વિદેશ મંત્રાલય અનુસાર, ૨૮૮ ભારતીય નાગરિકોનો સંપર્ક થઈ શક્યો નથી. તેમાંથી ૭૩ લોકો હાઇડ્રોપાવર પ્રોજેક્ટમાં કામ કરતા હતા અને બાકીના કૈલાશ માનસરોવર યાત્રાએ ગયા હતા.
આંતરરાષ્ટ્રીય સ્તરે પણ મદદ મળી રહી છે. અમેરિકાએ ૫ લાખ ડોલર, બ્રિટને ૫૦ લાખ પાઉન્ડ અને શ્રીલંકાએ ૧૦ લાખ ડોલરની આર્થિક સહાય આપવાની જાહેરાત કરી છે. નેપાળના વડાપ્રધાન બાલેન શાહે નુવાકોટ જિલ્લાના વિદુર નગરપાલિકા વિસ્તારની મુલાકાત લઈ સ્થિતિની સમીક્ષા કરી હતી. ચીનના વડાપ્રધાન લી છિયાંગે પણ તિબેટના ગ્યીરોંગ વિસ્તારમાં રાહત કાર્યનું નિરીક્ષણ કર્યું હતું.
આ દુર્ઘટનાનું કારણ હિમનદી તૂટવાનું જણાવવામાં આવી રહ્યું છે. લાંગતાંગ લિરુંગ પર્વત પાસે હિમનદીનો મોટો ભાગ અચાનક તૂટી પડ્યો હતો અને તેની સાથે ખડકો પણ ધસી આવ્યા હતા. બરફ અને કાટમાળથી લ્હેંદે નદીનો પ્રવાહ રોકાઈ ગયો હતો. આ અસ્થાયી બંધ તૂટતાં ભોટેકોશી અને ત્રિશૂલી નદી તંત્રમાં પાણી અને કાટમાળનો પ્રવાહ ફાટી નીકળ્યો હતો. યુએસજીએસ અને વિજ્ઞાનીઓના જણાવ્યા અનુસાર, પહેલાં જેને ૪.૪ તીવ્રતાનો ભૂકંપ માનવામાં આવતો હતો, તે વાસ્તવમાં હિમનદી તૂટવા અને ખડકો ધસવાને કારણે થયેલી હલચલ હતી.
દરમિયાન, ભોટેકોશી નદીના ઉપરી ભાગમાં કાટમાળ જમા થવાથી એક નવું સરોવર બન્યું છે, જેમાં લગભગ ૨૦ લાખ ઘન મીટર પાણી જમા થઈ ચૂક્યું છે. જો આ કુદરતી બંધ તૂટશે તો નીચાણવાળા વિસ્તારોમાં ફરી પૂર આવી શકે છે. આ જોખમને ધ્યાનમાં રાખીને ઉત્તર પ્રદેશના મહારાજગંજ અને કુશીનગરમાં હાઇ એલર્ટ જાહેર કરાયું છે. બિહારના વાલ્મીકિનગર વિસ્તારમાં પણ સાવચેતી રાખવા સૂચના આપવામાં આવી છે.