ઈરાનના સર્વોચ્ચ નેતા આયતોલ્લાહ અલી ખામેનેઈએ મુસ્લિમ દેશોને એકતા જાળવી રાખવા અને પોતાના સાચા દુશ્મનને ઓળખવાની અપીલ કરી છે. તેમણે સોશિયલ મીડિયા પ્લેટફોર્મ X પર કરેલી પોસ્ટમાં જણાવ્યું કે ઈસ્લામના દુશ્મનો જાતિ, સંસ્કૃતિ, આર્થિક, રાજકીય અને ભૌગોલિક તફાવતોનો લાભ ઉઠાવી મુસ્લિમોમાં ભાગલા પાડવા માગે છે.
ખામેનેઈએ પેલેસ્ટાઈનની વર્તમાન સ્થિતિ અંગે ચિંતા વ્યક્ત કરતાં કહ્યું કે, જો આખી દુનિયાના મુસ્લિમો એક સાથે રહ્યા હોત તો શું પેલેસ્ટાઈનની આવી હાલત થઈ હોત? તેમણે ઈસ્લામિક સમુદાયની સમસ્યાઓનો ઉકેલ એકતા, મિત્રતા અને સહયોગમાં હોવાનું જણાવ્યું હતું.
અમેરિકા અને ઈઝરાયલને મુસ્લિમ એકતાના કટ્ટર દુશ્મન ગણાવતાં તેમણે કહ્યું કે, અમેરિકાના શાસકો અને ઈઝરાયલ મુસ્લિમો વચ્ચેની એકતા અને મિત્રતાના દુશ્મન છે. તેમણે પશ્ચિમ એશિયા અને પર્સિયન ગલ્ફના શાસકોને અપીલ કરી કે તેઓ પોતાના સાચા દુશ્મનને ઓળખે.
આર્થિક બાબતે તેમણે કહ્યું કે, સ્થાનિક ઉત્પાદનને પ્રોત્સાહન આપવું અને વ્યવહારોમાં યુએસ ડોલર પર નિર્ભરતા ઘટાડવી એ આત્મનિર્ભર અર્થતંત્ર માટે જરૂરી છે. તેમણે આર્થિક સ્થિતિસ્થાપકતાને બાહ્ય નાણાકીય દબાણનો સામનો કરવા અને લાંબા ગાળાની સ્થિરતા માટે જરૂરી ગણાવી.
આ નિવેદન એવા સમયે આવ્યું છે જ્યારે ૨૪ ઓગસ્ટે અમેરિકી ટ્રેઝરી સેક્રેટરી સ્કોટ બેસેન્ટે 'ઓપરેશન ઈકોનોમિક આઉટકાસ્ટ' શરૂ કરવાની જાહેરાત કરી હતી. આ અભિયાનનો હેતુ વિશ્વભરમાંથી ઈરાનના નાણાકીય જોડાણો તોડવાનો અને ત્યાંના શાસનને મળતા આવકના સ્ત્રોતો રોકવાનો છે.
ઉલ્લેખનીય છે કે, આયતોલ્લાહ અલી ખામેનેઈ ૧૯૮૯થી ઈરાનના સર્વોચ્ચ નેતા છે. મુસ્લિમ દેશોમાં એકતા અને પશ્ચિમી શક્તિઓ સામે પ્રતિકારની તેમની અપીલ નવી નથી, પરંતુ પેલેસ્ટાઈનના સંદર્ભમાં તેમણે આ વખતે વધુ ભારપૂર્વક વાત કરી છે. તેમણે ઈસ્લામિક દેશોને બાહ્ય દબાણનો સામનો કરવા આર્થિક સ્વાવલંબન અપનાવવાની સલાહ પણ આપી છે.
આ નિવેદનને પશ્ચિમ એશિયામાં ચાલી રહેલા સંઘર્ષ અને ઈરાન પર વધતા આંતરરાષ્ટ્રીય દબાણના સંદર્ભમાં જોવામાં આવી રહ્યું છે. ઈરાન પર અમેરિકા સહિતના દેશો દ્વારા કડક આર્થિક પ્રતિબંધો લાદવામાં આવ્યા છે, જેની અસર તેની અર્થવ્યવસ્થા પર પડી છે.