ગાંધીનગરઃ ગુજરાત સરકારે ખાનગી શાળા અને કોલેજોના રાષ્ટ્રીય કેડેટ કોર્પ્સ (NCC) વિદ્યાર્થીઓ માટે મહત્વનો નિર્ણય લીધો છે. હવે રાષ્ટ્રીય NCC કેમ્પોમાં ભાગ લેનાર ખાનગી શાળા-કોલેજના વિદ્યાર્થીઓનો સંપૂર્ણ ખર્ચ રાજ્ય સરકાર ઉઠાવશે. શિક્ષણ વિભાગ દ્વારા આ અંગે ઠરાવ પસાર કરવામાં આવ્યો છે.
અત્યાર સુધી સરકારી શાળા અને કોલેજોના NCC કેડેટ્સને રાષ્ટ્રીય કેમ્પોમાં જવા માટે કેન્દ્ર સરકાર તરફથી ખર્ચ આપવામાં આવતો હતો. પરંતુ ખાનગી શાળા-કોલેજના વિદ્યાર્થીઓને આ સુવિધા મળતી ન હતી. પરિણામે, તેમણે પોતાના ખર્ચે કેમ્પમાં જવું પડતું હતું, અથવા ખાનગી શાળા-કોલેજને ખર્ચ ભોગવવો પડતો હતો. આ નિર્ણયથી આર્થિક બોજને કારણે કેમ્પમાં જોડાઈ ન શકતા તેજસ્વી વિદ્યાર્થીઓને સમાન તક મળશે.
રાષ્ટ્રીય કેમ્પોમાં રિપબ્લિક ડે કોન્ટિન્જેન્ટ, થલ સૈનિક કેમ્પ, યુથ એક્સચેન્જ પ્રોગ્રામ, વાયુ સૈનિક કેમ્પ, નેવી સૈનિક કેમ્પ જેવી પ્રવૃત્તિઓનો સમાવેશ થાય છે. આ કેમ્પો માટે સરકારી શાળાના વિદ્યાર્થીઓને મિસિંગ, ટ્રાવેલિંગ જર્ની રેશન, ઈન્સિડેન્ટલ, પીઓએલ ચાર્જીસ સહિતના ભથ્થા કેન્દ્ર સરકાર ચૂકવે છે. પરંતુ ખાનગી શાળાના વિદ્યાર્થીઓને આ ભથ્થું આપવામાં આવતું ન હતું. આથી ખાનગી કોલેજ-શાળાના ઘણા પ્રતિભાશાળી વિદ્યાર્થીઓ રાષ્ટ્રીય સ્તરે પસંદગી પામ્યા છતાં આર્થિક કારણોસર કેમ્પમાં જવાનું ટાળતા હતા.
રાષ્ટ્રીય કેમ્પોમાં પસંદગી માટે કેડેટ્સે અંદાજે ચાર-પાંચ સ્પર્ધાત્મક કેમ્પોમાં ભાગ લેવાનો હોય છે. આ પ્રક્રિયામાં મુસાફરી અને અન્ય ખર્ચ થાય છે. ખાનગી શાળા-કોલેજના વિદ્યાર્થીઓ માટે આ ખર્ચ ઉઠાવવો મુશ્કેલ બનતો હતો. હવે રાજ્ય સરકાર આ તમામ ખર્ચ ભોગવશે. આ માટે NCC નિયામક કચેરીએ સરકારને દરખાસ્ત કરી હતી, જેને મંજૂરી આપતા શિક્ષણ વિભાગે ઠરાવ પસાર કર્યો છે.
ઠરાવ મુજબ, ખાનગી શાળા-કોલેજના કેડેટ્સને સરકારી શાળાના કેડેટ્સની જેમ જ ભથ્થા મંજૂર કરવામાં આવશે. આ ખર્ચનો 100% હિસ્સો રાજ્ય સરકાર ઉઠાવશે. આ નિર્ણયથી NCCમાં જોડાતા વિદ્યાર્થીઓની સંખ્યામાં વધારો થવાની અપેક્ષા છે. સમાન તકના સિદ્ધાંતને અનુસરતો આ નિર્ણય ગુજરાતના યુવાનોને રાષ્ટ્રીય સ્તરે પોતાની ક્ષમતા દેખાડવાનો માર્ગ ખોલશે.