ઇન્ડિયન પ્રીમિયર લીગ (IPL)માં ઈમ્પેક્ટ પ્લેયર નિયમને લઈને સતત ઉઠતા સવાલો વચ્ચે ભારતીય ક્રિકેટ કંટ્રોલ બોર્ડ (BCCI)એ તમામ 10 ફ્રેન્ચાઈઝી ટીમો પાસેથી સત્તાવાર ફીડબેક માંગ્યું છે. ટીમોએ આ નિયમ યથાવત રાખવો, તેમાં ફેરફાર કરવો કે તેને સંપૂર્ણપણે હટાવી દેવો – આ અંગે પોતાનો અભિપ્રાય 31 ઓગસ્ટ સુધીમાં બોર્ડને મોકલવાનો રહેશે.
આ નિયમ છેલ્લા કેટલાક સીઝનથી IPLની સૌથી ચર્ચિત બાબતોમાં સામેલ છે. ખાસ કરીને IPL 2026માં મોટા સ્કોરની સંખ્યામાં આવેલા વધારા બાદ તેના પ્રભાવ પર સવાલો ઊભા થયા છે. ટીકાકારોનું માનવું છે કે વધારાનો ખેલાડી ઉપલબ્ધ હોવાથી બેટિંગમાં ઊંડાણ વધે છે, જેનો સીધો ફાયદો રન બનાવનારી ટીમોને મળે છે. બીજી તરફ સમર્થકોની દલીલ છે કે આ નિયમ કેપ્ટનોને પરિસ્થિતિ પ્રમાણે વધુ વ્યૂહાત્મક વિકલ્પો આપે છે.
આ નિયમ અંગે માત્ર નિષ્ણાતો અને ચાહકોએ જ વાંધો ઉઠાવ્યો નથી. રોહિત શર્મા અને વિરાટ કોહલી જેવા ભારતીય ક્રિકેટના દિગ્ગજ ખેલાડીઓ પણ આ નિયમ પ્રત્યે અસહમતી દર્શાવી ચૂક્યા છે. છેલ્લી સીઝન દરમિયાન યોજાયેલી એક બેઠકમાં ઘણી ટીમોના કેપ્ટનોએ પણ આ નિયમનો વિરોધ નોંધાવ્યો હતો.
BCCI સચિવ દેવજીત સૈકિયાએ મે મહિનામાં જણાવ્યું હતું કે IPL 2026 પૂર્ણ થયા બાદ ઈમ્પેક્ટ પ્લેયર નિયમની સમીક્ષા કરવામાં આવશે. હવે બોર્ડે તે જ દિશામાં પગલું ભરતા ટીમો પાસેથી લેખિત અભિપ્રાય લેવાની પ્રક્રિયા શરૂ કરી દીધી છે.
એક અહેવાલ મુજબ BCCIએ ફ્રેન્ચાઈઝી ટીમો પાસે ઈમ્પેક્ટ પ્લેયર નિયમ ઉપરાંત PMOA (પ્લેયર્સ એન્ડ મેચ ઓફિશિયલ્સ એરિયા), અમ્પાયરિંગ, પ્રેક્ટિસ સેશન અને પ્લેઈંગ કંડિશન્સ સહિત અનેક ક્રિકેટ ઓપરેશનલ બાબતો પર સૂચનો માંગ્યા છે. ટીમોને પોતાની ક્રિકેટ ઓપરેશન્સ યુનિટ સાથે ચર્ચા કરીને તમામ મુદ્દાઓ પર સંયુક્ત પ્રતિક્રિયા મોકલવા કહેવામાં આવ્યું છે. મળેલા સૂચનોના આધારે આગામી સીઝન પહેલા જરૂરી સમીક્ષા અને કાર્યવાહી કરવામાં આવશે.
સૈકિયાએ અગાઉ કહ્યું હતું કે, 'BCCIને IPL ટીમો તરફથી ઈમ્પેક્ટ પ્લેયર નિયમ સામે કોઈ સત્તાવાર ફરિયાદ મળી નથી. ટુર્નામેન્ટમાં માત્ર 200+ના સ્કોર જ નથી બન્યા, પરંતુ કેટલાક ઓછા સ્કોરવાળા મુકાબલા અને બોલરોનું પ્રભાવશાળી પ્રદર્શન પણ જોવા મળ્યું છે.' તેમણે વધુમાં જણાવ્યું કે બોર્ડ છેલ્લા બે વર્ષથી આ વ્યવસ્થા પર ચર્ચા કરી રહ્યું છે. ફ્રેન્ચાઈઝી ટીમો તરફથી સત્તાવાર ચિંતા સામે આવ્યા બાદ જ તેની સમીક્ષાને આગળ વધારવાનું નક્કી થયું હતું. હવે તમામ ટીમો પાસેથી સીધું ફીડબેક માંગવું એ આ જ પ્રક્રિયાનો આગળનો તબક્કો માનવામાં આવી રહ્યો છે.
31 ઓગસ્ટ સુધીમાં ફ્રેન્ચાઈઝીઓનો અભિપ્રાય મળ્યા બાદ BCCI પાસે ત્રણ વિકલ્પો હોઈ શકે છે – હાલના નિયમને યથાવત રાખવો, તેમાં ફેરફાર કરવો અથવા તેને હટાવી દેવો. હાલમાં બોર્ડે આમાંથી કોઈ વિકલ્પ પર સત્તાવાર નિર્ણય લીધો નથી. જો ફ્રેન્ચાઈઝી ટીમોના સૂચનોમાં વ્યાપક ફેરફારની માગ સામે આવે છે, તો આગામી સીઝન પહેલા ઈમ્પેક્ટ પ્લેયર નિયમમાં સુધારાની શક્યતા વધી જાય છે.