ઈટાલીના ઉત્તરીય પ્રદેશમાં આવેલા ફોર્લી શહેરમાં તાજેતરમાં આવેલા તોફાને ભારે તબાહી મચાવી હતી. આ દરમિયાન ફોર્લી વિમાનમથક પર ઊભેલા ત્રણથી ચાર મોટા વિમાનો પવનના જોરથી પલટાઈ ગયા હતા. હવાની ઝડપ 120 કિલોમીટર પ્રતિ કલાક સુધી પહોંચી ગઈ હતી. આ ઘટનાનો વીડિયો સોશિયલ મીડિયા પર ઝડપથી ફેલાયો હતો.
વાયરલ થયેલા વીડિયોમાં જોઈ શકાય છે કે કેવી રીતે મોટા વિમાનો રમકડાંની જેમ ફંગોળાઈ જાય છે અને ઊંધા પડે છે. આ દૃશ્ય જોવાથી એવું લાગે છે કે જાણે તે કાગળના બનેલા વિમાનો હોય. પરંતુ વાસ્તવમાં તે બધા મોટા વ્યાવસાયિક વિમાનો હતા, જેનું વજન ઘણું હોય છે. આ ઘટનાએ વિમાનમથક પર હાહાકાર મચાવી દીધો. સામાન્ય રીતે તીવ્ર પવનમાં નાના વાહનો પલટાય તેવું બને છે, પરંતુ આટલા મોટા વિમાનો પલટાય તે અસામાન્ય છે.
ઘટના બાદ તાત્કાલિક અસરથી વિમાનમથક બંધ કરી દેવામાં આવ્યું હતું. આગામી કલાકો સુધી તમામ ઉડ્ડયન સેવાઓ રદ કરવામાં આવી હતી. વિમાનમથકની છતને પણ નુકસાન થયું હતું. પલટાયેલા વિમાનોમાં કેટલાક ક્રૂ સભ્યો હતા. હવાનું જોર ઓછું થયા પછી બચાવ ટીમોએ તેમને સલામત રીતે બહાર કાઢ્યા હતા. બાદમાં બળતણ લીકેજ અને અન્ય સુરક્ષા તપાસ હાથ ધરવામાં આવી હતી. આ કારણે વિમાનમથક લાંબા સમય સુધી બંધ રહ્યું હતું.
ફોર્લી શહેરમાં પણ આ તોફાનની ભારે અસર જોવા મળી હતી. અતિ ભારે વરસાદને કારણે શહેરના અનેક વિસ્તારોમાં પૂર જેવી સ્થિતિ સર્જાઈ હતી. કેટલાય દિવસથી રસ્તાઓમાં પાણી ભરાયું હોવાથી લોકો ફસાઈ ગયા હતા. ઘણાં વૃક્ષો ઉખડી ગયાં હતાં. આ ઉપરાંત કેટલાક વિસ્તારોમાં ભૂસ્ખલન થયું હતું. સ્થાનિક વહીવટી તંત્ર અને આપત્તિ રાહત ટીમોએ રાહત અને બચાવ કામગીરી શરૂ કરી હતી. અંદાજે 250 પ્રવાસીઓને સલામત સ્થળે ખસેડવામાં આવ્યા હતા.
અહેવાલો અનુસાર, ઈટાલીના કેટલાક ભાગોમાં ભારે ગરમી પછી અચાનક આ પ્રકારનું તોફાન આવ્યું છે. ફોર્લી ઉપરાંત આસપાસના વિસ્તારોમાં પણ ભૂસ્ખલન થવાની ઘટનાઓ સામે આવી છે. જેના કારણે લોકોને સલામત સ્થળે ખસેડવા પડ્યા હતા. વિમાનમથકમાં અટવાયેલા મુસાફરો માટે વહીવટી તંત્ર દ્વારા રહેવાની અને ખાવાની વ્યવસ્થા કરવામાં આવી હતી. આ ઘટનામાં કોઈ જાનહાનિ થઈ નથી તેવી પ્રાથમિક માહિતી છે.
હવામાન વિભાગે આગામી દિવસોમાં હવામાન સામાન્ય રહેવાની આશા વ્યક્ત કરી છે. અત્યારે વિમાનમથક અને શહેરમાં થયેલા નુકસાનનું મૂલ્યાંકન કરવામાં આવી રહ્યું છે. સંબંધિત અધિકારીઓએ જણાવ્યું છે કે વિમાનમથકને ફરી શરૂ કરવા માટે સમારકામની કામગીરી ચાલુ છે. મુસાફરોને વિમાનમથકની સ્થિતિ વિશે અપડેટ મળી રહે તે માટે વિમાનમથકના અધિકારીઓએ સૂચના આપવાનું શરૂ કર્યું છે.